Dos reales de los míos

Antes p’a las Ferias beniban otra cllase de paradas, no bendeban tanta ropa ni zapatos ni alpargatas, eban otros artículos. Charlatans los llamaban.
El más pupulá de toz eba El Pequeño Catalán. Bendeba de to las cosas d’ende mantas a ojetas d’afaitá, i teniba una moneta que sienpre estaba chugán.
Otras bendeban pomadas en una maleta prou gran fechas de sebo de culebra, p’a cuan s’endibinaban los mals.
Ñaeba otra parada bendén piedras p’afilá, las pasaba por una dalla, i cortaba el papel de fumá.
Pa fé la demostración con un fierro chafaba el filo, se la pasaba pol cuello i diba … ¡No corta asolutamente nada! Le pasaba otra bez la piedra i a cortá papel s’adicho.
Pero una bez de chafale el filo se bei no s’enbacordá, y al pasala p’ol cuello, el misache se bá-fé un trapal, i en la farmacia Alifonso Castán lo ban tení que curá.
Ahora en la parada que sigue é la que mos tenín que centrá. Ñaeba una meseta con un chirimbolo colgáu i dos pilonez a cada láu. Si mobebas el péndulo i cuan beniba p’atrás, tirabas el piloné, premio tenibas ya.
L’amo dixa parada s’eba buscáu un zagal que le fese de gancho i, cuan la chen s’amontonaba, el zagal se meteba a tirá sacán mui güenos premios, que dinpués teniba que torná y le daba más dinés. Pa que tornase a tirá.
Ixo le daba rabia, pos los otros zagals del llugá sienpre se l’en reíban cuan se posaba a tirá.
Las tiradas eban por premios. Dos reales, un reloj, un real, un mechero, una perra, un cuarterón (tabaco).
El reloj eba la illusión del zagal. Catorce n’eba sacáu en la Feria, i denguno s’enbá podé quedá, pos acordanse de la burlla que le feban los amigos, bá gritá fuerte el zagal,
¡Ahora boi a tirá … con dos reales de los míos!

P.D.: To esto eba real, en las Ferias de Graus, anda l’antrada de los años 1.940.

Luisón de Fierro

Fé pa recordá

Esta historieta que voy a contatos é el encuentro de dos zagals de Graus dimpués d’un montón d’años de no veyese, pero que cuan eban críos se teniban mucho aprecio y eban prou enchugaldriús. Sus nombres son Pepón y Carlons, y así tos relato su encuentro en la pllaza España.

Pepón: ¿Cuánto tiempo feba que no t’heba visto Carlons? Sabeba qu’estabas en Barcelona, pero no t’heba visto desde chicorrón.

Carlons: Yo tamé m’alegro de vete y de que te acordes de cuan chugaban es esta pllaza.

P: Si tiens un poqué de tiempo podrían charrá un raté de to las cosas que mos sucedeban cuan eban críos y lo ven que mos lo pasaban chugan, asinas mos volverén más chovens, onque sólo seiga por un raté.

C: ¿T’acordas de cuan chugaban a los pitos, o los cartonez, a las perras negras, … y al marro? ¡Qué ben mos lo pasaban!

P: Carlons, m’has dau una idea prou güena y que podrían probá a ambolicamos pa ponela en marcha. ¿Y si fesen una asociación de “zagals” de 40 a 65 años? Así recuperarían los chuegos d’entonces, posanlos en prática, achuntanmos en la Pllaza los sábados po la mañana pa que los críos d’ahora mos veyesen chugá y lo ben que mos lo pasaban nusotros de chicoz.

C: No é miaja mala idea Pepón, sería una güena manera d’achuntamos toz los de ixa edá y podé comentá to las cosas que mos pasaban, hasta podríam filmá los chuegos pa que quedasen grabáus en cinta.

P: ¡Chusto lo que me pasaba a yo po la cabeza! Aparte de fílmalo to, podrían escribí un llibré con to las cosetas que ixen recordán pa í escribinlas tal y como el charraban nusotros.

C: ¿Cómo podrían llamá a ixa asociación pa danos a conocé?

P: Discurrín, discurrín, m’ha veniú un nombre. A vé que te paece, Asociación Enchugaldriús de Graus.

C: Pepón, ¿cómo has discurriú tanto? T’has fijáu que las siglas qu’en salen d’astí é como la marca d’unos electrodomésticos, AEG.

P: Milló, asínas podrém  recordalo.

C: Yo en tiengo guardáus muchos cromos, perras negras y pitos de toz los colós. Tamé ñai guardáus muchos recuerdos pa podé compartilos. Bueno Pepón, mos tenín que despedí, pues tiengo a la mullé comprán llonganiza pa llevamos pa casa y no quiero fela esperá más.

P: Un saludo pa tu mullé y pa los zagals que tiens y a vé cuan mos podem achunta de nuevo. A yo me gustaría que fuese cada dos meses, en este mismo llugá, y podé í recordán cosetas d’antes. Un saludo pa toz los vuestros.

Esta charradeta entre estos dos amigos puede fé que salga de nuestro interió el crio que toz tenín dentro, cuan llegán a una edá en la que ya sólo mos quedan los recuerdos.

José Antonio Betato