Contán cuentos

La lechera

Y cuan ya s’en iba su tio, le va dí la moceta: “Compre-me una craba pa yo, que me’n iré a vendé la leche a Graus”. Y su tio la va í a comprá el día que se’n iba. Y como la moceta heba dicho en casa: “Me’n iré a vendé la leche a Graus”, van pensá su pare y su abuelo: “La de to las crabas podría í a vendé esta zagala; mos tocarían buenos dinés”. Y la moceta va dí entonces: “Y a yo qué me darán de llevá-la?-Como tiens una craba, te darém pa tú lo que saques un día de la semana” Y ella se va fé mui contenta, y en va í traen mucho tiempo, y con lo que le tocaba de cada semana, se va comprá un pañuelo de sarja y un apretadó, y va pensá ella: “Ora, ya tiengo prou ropa, y con lo que’n saque hoy de la leche, que’n faré? Me’n iré a Puicremá, que tienen muchas gallinas y me’n compraré una; le posaré veintitrés huegos y me sacará lo menos veinte pollos; las pollas, me las dixaré en casa pa que posen y me’n venderé los huegos; los pollos, me los venderé en Graus el día de la fiesta, que los pagan milló que en to’l año, y me guardaré los dinés hasta que me pueda comprá una vaca, y la vaca me parirá un novillo, y con lo que me’n saque del novillo, de los huegos y de los pollos de l’otro año que posaré tres o cuatro lloradas, yo me compraré un campo, y la vaca ñ’habrá paríu otro novillo, y los huegos y la leche que haiga vendíu, ya seré la más rica de toz estos llugás, y entonces ixe Ramonón de la Terrazuela que é tan presumíu, ya n me llamará Mariona, sino que me dirá: “Marieta, te quiés casá con yo?. Y yo le diré: “Ora viens con estas?. No, haber veníu antes,; ora, porque soi rica, me llamas Marieta, antes siempre me llamabas Mariona; yo me quiero casá mui a gusto, me’n quiero í el día de San Miguel a la feria, y pa ixo, me posaré ben maja, que aquel día acuden a Graus to los millós mozos que ñ’hai al rededó y me triaré al más guapo que veiga”. Y al dí esto, entrepuza en una pedra; se le cai el cantre y se le va fé a peazos y adiós ilusiones.

Contau per Damaso Carrera a Jean Joseph Saroïhandy (1867-1932), l’año 1896 en Graus. Saroïhandy va sé el primer llingüista que va estudiá el charrá de Graus, entre atros llugás de la baixa Ribagorza. Dimpués va seguín estudián l’aragonés de las vals d’Anso, Echo, Chistau y Benás.