Eba el mes d’agosto de 1.888. El Barrichós, u barrio d’abaixo, preparaba las fiestas, pos el día 15 d’agosto, eba la tradizión. To eban barucas p’o las noches cuan feban las reunións, en las cuatro esquinas, entre Casa Batista, Casa Fornero, Casa Barranquín i Casa Perales. Allí rescurriban i acordaban lo que queriban fe, i sobre to, lo más importante, … d’on sacarían los dinés. Lo prenzipal, eba la mósica, unos , que las Trompas d’Arén, otros que las Gaitas de Caserras. Pos ñaeba prous partidarios que tocasen las de Graus. Plana el trombón, Viu i Lascuarre, trompetas, Justo el Ciego, el briolín, Pascualón el cllarinete, Volante, la guitarra, i uno de casa el Dorado, qu’eba rebotáu de cura, l’acordión. Toz abllaban a la bez, i mai se posaban d’acuerdo. Ñaeba veces, que de pallabras se pasaban a las manos, pos sólo faltaban tres u cuatro días pa la Virgen … cuan van llegá a l’acuerdo. En la era de Sosó, one siempre se feba el baile, aún ñaeba faixos de garba, palluz sin amontoná, i al ve que los mozos no se posaban d’acuerdo, los casáus lo van tení que soluzioná. Feba unos cuantos días, eba llegáu de la Franzia el siño Inazio Barón, que además de apargatero, tocaba la mandurria, que seguntes diban que la feba abllá. Los casáus, van abllá con él, i Barón les va di que si, pero teniban que buscale uno que tocase la guitarra, pos si mos entendén güena fiesta ñabrá. Pos traigo piezas nuebas de la Franzia, i más en t’adebán, son bailes modernos que me penso que tos gustarán. N’el Barrichós ñaeba uno que tocaba la guitarra, el siño José del Volante, que tamé les ba-di que si, pero, primero tendrén qu’ensayá, i como faltan pocos días … no se como mos saldrá. Los ensayos se ban fe rápidos, debaixo el nuguero Sosó, n’el mismo eszenario que se teniba que fe el baile. Unque sólo faltaban dos u tres días, ban ensayá día i noche, i el día de la Virgen ban torná ben pronto p’o la mañana. Pos se-ban compenetra tanto i tan ben como si esen iú chuntos to la vida. Paso-dobles i mazurcas, les saliban prou ben, lo que más les ba costá, la pieza nueba que traeba de la Francia. Eba una polka-mazurca (la de Piké u otras). Pos el Volante no las eba tocáu nunca, sólo las eba sentíu pocas beces pa cuan el baile de las Zintas que feba pocos años que las ban astrená con las Trompas d’Arén. Las ban ensayá tantas
Dos p’aquí, dos p’allá
media güelta que se da.
Dos p’aquí, dos p’allá’
i otra vez güelta anpezá.
Marcán ben el compás,
I posán prou atenzión,
Las mozas llozirán,
n’el baile el Polisón.
Los zagals ban botián,
las zagalas ban rodán,
la torta i el porrón,
los biejos l’ascularán.
Dos p’aquí, dos p’allá,
a causáu mucho furó,
i ya l’an bautizáu,
como el baile el Barrichós.